Служба Пресвятыя Богородицы ради Ея чудотворныя иконы, именуемыя «Коложская», яже на Белой Руси во граде Гродно

СЛУЖБА ПРЕСВЯТЫЯ БОГОРОДИЦЫ
РАДИ ЕЯ ЧУДОТВОРНЫЯ ИКОНЫ,
ИМЕНУЕМЫЯ «КОЛОЖСКАЯ»,
ЯЖЕ НА БЕЛОЙ РУСИ ВО ГРАДЕ ГРОДНО

ВЕЧЕР

На «ГОСПОДИ, ВОЗЗВАХ» стихиры, глас 1-й:

Подобен: Небесных чинов:


Небесныя силы радуются,/ преславно служаще чудней иконе Богоматере,/ и к веселию земныя духом призывают,/ покров и заступление Пречистыя Девы проповедуют - / граду нашему и всякому жительству благочестивых// твердое ограждение и защищение.

Твоему, Владычице, чудотворному образу/ со трепетом предстояще людие,/ яко Самей Ти сущей с нами,/ достодолжное поклонение приносят,/ истинную Богородицу// православно поюще Тя.

С преславными чинми ангельскими днесь,/ и со пророки, апостолы и евангелисты,/ со святители, мученики, преподобными и праведными,/ ликовствуем и вопием немолчно,/ прославляюще чудный Коложский образ Небесныя Царицы - / источник неоскудный исцелений/ на Белой Руси издревле явленный// и пределы Городенския напояющий присно.

Ины стихиры, глас тойже:

Подобен: Всехвальнии мученицы:

Престол огненный и Палата приукрашенная,/ Ты еси, Богородице Марие, пророки воспетая,/ Тайне Воплощения Сына Божия смиренно послужившая,/ великия благодати паче всех земнородных сподобилася еси,/ еяже причастники святыя иконы Твоя являеши,/ да нас окамененных сердцем и огрубевших духом/ на пути спасения наставиши// и ко умилению и благоговению призовеши.

Честную и чудотворную Твою икону,/ Пречистая Богоотроковице,/ издревле на Коложе даровала еси всем/ яко источник, источающ благодати присноживотныя воды./ Еяже ныне празднество светло совершаем,/ почитающе Тя, Заступницу наше усердную.

Святых мученик Бориса и Глеба,/ храм на Коложе днесь украсися,/ и вся земля Городенская торжествует,/ в нарочитом празднице иконы Богоматере,/ Яже есть Освящение наше и Поможение,/ Стена Нерушимая граду сему// и всем благочестивым Державный Покров.

Слава, и ныне, глас тойже:

Небесных чинов радование/ и всех земнородных веселие/ Ты еси, Богоотроковице Чистая,/ всея вселенныя Молебница и Предстательница,/ пред Богом за ны грешныя Ходатаица,/ Скоропослушная к смиренным прошением,/ печалей наших Утоление,/ скорбящих Радование,/ воистину, язык наш не довлеет,/ по достоянию Тя воспевати,/ обаче, Благая сущи, приими сия усердныя благохваления,/ пред Коложским образом возносимыя присно:/ «О Мати и Дево Благодатная,/ благословенна Ты в женах,/ и благословен Плод чрева Твоего - // Христос Спаситель мира Бог наш.

Вход. Прокимен дне. Чтения Богородицы обычныя.

Аще изволит настоятель пети литию, стихиры храма и сии самогласны:

Гпас 3-й:

Икона Твоя, Богородице, Коложская/ духовное сокровище воистину есть,/ во граде нашем явленное,/ и всех туне обогащающее,/ с верою и любовию Тебе поклоняющимся./ К нейже мы всегда прибегаем,/ моления сердечная приносяще,/ скорое утешение и помощь приемлем,/ непрестанно во умилении взывающе:// радуйся, ко спасению наша Благая Одигитрие.

Гпас 4-й:

Ныне всяк возраст и сословие/ о Тебе, Богородице, хвалится,/ святыя Твоея Коложския иконы торжество сотворяюще,/ и в веселии вопиет немолчно:/ Преблагословенная Владычице Марие,/ не отврати Лица Твоего от града сего/ и спаси благочестивыя// Твоими молитвами от всяких бед и зол.

Слава, и ныне, глас 5-й:

Приидите, людие,/ чудотворному Коложскому поклонимся Божия Матере образу,/ егоже дарова Владычице праотцем нашим/ яко залог спасительный Своего непрестаннаго попечения/ о граде сем и людех земли нашея,/ идеже яко звезды безчисленныя сияют многия святыя иконы,/ обильныя дары духовныя непрестанно точащия/ всем к заступлению Пречистыя Девы притекающим// и Богородицу и Матерь Света в песнех величающим.

На стиховне стихиры, глас 2-й:

О Всенепорочная Дево,/ что Ти благодарение принесем,/ яко чудотворным Своим образом Коложским/ присно нам во обстояниих пособствуеши,// от бед и напастей милостивно заступающи.

Стих: Помяну имя Твое/ во всяком роде и роде.

О Пресвятая Госпоже Богородице,/ призри и ныне на моления рабов Своих,/ пред Коложским образом благочестно воспевающих Твоя чудеса,/ и верно Ти - Первообразней - поклоняющихся.

Стих: Лицу Твоему помолятся/ богатии людстии.

Волнением житейским обуреваеми,/ не имамы тихаго пристанища,/ разве Тебе, Богородице Дево,/ на всяцем месте Тобою утешаеми,/ наипаче же пред Коложскою иконою мир и тишину обретаем.

Слава, и ныне, глас 8-й:

Приидите ныне, празднолюбцы,/ воспомянем труды святаго евангелиста Луки,/ перваго написавшаго образ Пречистыя Богородицы/ и принесшаго к Тебе, Невесте Неневестней,/ Ты же рекла еси со властию многою:/ с иконою сею Моя благодать и сила да будет./ Тожде обетование и со всяким образом пребывает,/ аще мы с верою к Богородице прибегаем,/ смиренное прошение и благодарение приносим,/ со архангельским гласом поюще:/ радуйся, Благодатная, Господь с Тобою,// и Тобою с нами всегда.

ТРОПАРЬ, глас 4-й

Днесь возсия Пренепорочныя Девы торжество/ ради чудотворныя Коложския иконы,/ в пределех славнаго места Городенскаго явленныя,/ издревле чудеса и милости безчисленныя зде точащия// всем прибегающим под Ея державный Покров.

 

НА УТРЕНИ

По 1-м стихословии седален, глас 3-й:

Аще бы умолчати восхотехом/ о милостех и чудесех Пречистыя Девы,/ камение возопило бы о них по всей вселенней,/ жестокосердие и малодушие человеческое обличая/ и всегдашнюю милость Царицы Небесныя// к нам, недостойным и грешным, являя.

По 2-м стихословии седален, глас 4-й:

Чудесы безчисленными, Владычице,/ Господь Твою икону Коложскую прослави,/ да нас в вере и благочестии укрепит,/ не ради тленнаго прибытка и наслаждения,/ но ради нетленнаго венца и Царствия Божия,/ егоже восхищают вси подвизающияся внити// путем смирения и покаяния.

По полиелеи седален, глас 6-й:

Мраку нощному огустевающу,/ звезды небесныя являют свет,/ тожде зрим не токмо телесными очима, но и духовне,/ аще в мире сем умножается злоба и беззаконие,/ но не оскудевает долготерпение Господа/ и преизобилует милость Пресвятыя Богородицы,/ чрез Ея святыя иконы нам являемая.

По 50-м псалме стихира, глас 6-й:

Припадающе образу Твоему Коложскому, Владычице,/ архиереев и священников собор,/ монахов сословие и вси люди,/ со благоговением покланяются и умиленно глаголют:/ приими молитвы наша, Мати Чадолюбивая,// и избави ны от всякия нужды и печали.

КОНДАК, глас 4-й:

Светом Евангелия Христова озаряеми, людие,/ достойно ублажим Пречистую Богородицу,/ пред Ея чудотворною иконою усердно вопиюще:/ радуйся, Мати и Дево,// христиан Похвало.

На хвалитех стихиры, глас 4-й:

Подобен: Дал ecu знамение:

Дал еси, Господи, Твою Матерь,/ Помощницу роду человеческому,/ яко Благ и Многомилостив,/ Еюже паче естества соделал еси знамение/ и первозданное наше исправил еси Божественное достоинство./ Темже, всечестное Тоя иконы совершающе торжество,/ воспеваем Иисуса Сына Божия,// со Отцем и Духом покланяемаго.

Град, почитающий Тя и по долгу славящий,/ ограждаеши, Всепетая,/ иконою Твоею чудотворною,/ от всякия беды и нестроения,/ и болезней тлетворных и пагубы,/ Дево Неискусобрачная,/ сего ради Тя присно восхваляем,/ Предстательницу нашу непостыдную.

Коложскую икону Твою, Премилосердная Владычице,/ даровала еси граду Твоему,/ в немже имя Твое прославляется,/ вера Христова и благочестие укрепляются,/ суеверия и ереси низлагаются,/ ангели ликовствуют и рыдают демони,/ мы же непрестанно Богородице вопием:/ радуйся, Благодатная, Господь с Тобою,// и Тобою с нами во веки.

Слава, и ныне, глас 8-й:

Подобен: О, преславнаго чудесе:

О, преславнаго чудесе!/ Источник исцелений нам издревле явися - / чудотворная Коложская Твоя икона, Богородице,/ юже во граде нашем и на Белой Руси Господь прослави,/ в знамение присущей Церкви Христовой благодати/ и в благословение правоверным./ Сию убо мы достодолжным поклонением чествуем/ и со умилением вопием Первообразней:/ утверди нас в вере и благочестии// и настави на пути спасения.


Расклад богаслужэнняў

Увайсці

Аўтарызацыя

Імя карыстальніка *
Пароль *
Запомніць мяне

Падпіска на вершы Л.Геніюш

Каложа 360°

Навіны Гродзенскай епархіі

 

Уваход

Д/ф "Каложа" (2007 г.)