Каложскі дыярыуш. 17.12. Братэрства любіце. Віншуем рэдактара. Патоп. Рыцарскі верш і паэтычная спрэчка.

Сардэчна ўсіх вітаю!

Сённяшнюю старонку дыярыуша пачну са словаў апостала Пятра: “Братэрства любіце…” (1 Пт. 2, 17). Ды і як яго можна не любіць, калі яго хоць раз адчуеш?! Жыццё ў царкве і павінна быць такім братэрствам. Дзякую Богу, сёння адбылася цудоўная сустрэча з братамі і сёстрамі на нашых традыцыйных біблейскіх чытаннях. І разглядалі сёння менавіта другі раздзел з паслання ап. Пятра, дзе і гучыць гэты заклік. Братэрскі дух сустрэчы вызначыўся і супольнай малітвай, і паглыбленнем у Слова Божае, і віншаваннямі з нагоды дня нараджэння рэдактара нашага каложскага сайта – Мікалая. Яшчэ раз хачу выказаць шчырую павагу Мікалаю і пажадаць чакаемых і нечаканых дароў Божых!

Сам дзень выдаўся насычаным.

Падрабязней...

16.12. 2013 Каложскі дыярыуш. Пра рассеянасць і цэласнасць. Дзень народзінаў. Сустрэча з уладыкаю. Каложа і журналісты. Наймалодшы калажанін - Андрэй. Асцярожна - лёд!

Вітаю, шаноўныя чытачы Каложскага дыярыуша! Прыспела чарговая староначка дзённіка. Жыццё нашае, як заўсёды, вельмі насычанае. Заканчваецца яшчэ адзін год нашага жыцця. А канец года – гэта заўсёды падвядзенне вынікаў, справаздачы і цэлы ворах справаў, якія тэрмінова патрэбна закончыць. За ўсёй гэтай мітуснёй цяжка сканцэнтравацца на малітве, на духоўным самавыхаванні, а гэта так важна падчас посту і падрыхтоўкі да радаснага свята Ражджаства Хрыстова. Адным словам, адчуваецца нейкая раздробленасць і справаў, і думак, і пачуццяў. У такім стане разумееш, як патрэбна хрысціяніну духоўная цэласнасць ці, інакш кажучы, дабрадзецель цаламудрыя (уменне захоўваць сваю цэласнасць).

10 снежня адзначыў свой 35 дзень нараджэння. Атрымаў мноства самых цёплых віншаванняў. Яшчэ раз хачу падзякаваць усім маім дарагім сябрам за сардэчныя адносіны і за вашыя малітвы! Самыя, мабыць, радасныя для мяне віншаванні былі ад маіх былых студэнтаў-семінарыстаў. З гэтага года я пакінуў выкладанне ў семінарыі. І тым больш прыемна атрымаць словы віншавання і падзякі ад братоў, з якімі я імкнуўся дзяліцца не толькі нейкімі ведамі, але і асабістымі пачуццямі, досведам хрысціянскага жыцця і святарскага служэння. І віншаванні гэтыя - сведчанне таго, што праца мая ўсё ж такі не была дарэмнай.

Падрабязней...

27.11. Серада. Ідзі і пабач. Пачатак пасту. Рацыянальнае інтэрв’ю. Дарослы сямігадовы чалавек. Людзі на крызе.

Сёння фактычна пачаўся Ражджэственскі пост. Служылі Літургію. Евангельскае чытанне пра прызыванне апостала Філіпа і Нафанаіла - адзін з маіх улюбёных евангельскіх тэкстаў. Філіп заклікае Нафанаіла пайсці да Іісуса. Ён перакананы, што Іісус – Месія. Нафанаіл – скептык. Філіп, відаць, пачаў нешта тлумачыць, але зразумеў, што ў выпадку з Нафанаілам гэта бессэнсоўна. І вось апошні самы моцны аргумент: “Ідзі і пабач”. І Нафанаіл убачыў Таго, каго ўбачыць не чакаў – Цара Ізраілева Месію-Хрыста.

З досведу свайго святарскага служэння ведаю, што гэты метад працуе. Бывае тлумачыш, спрачаешся, даказваеш і потым як апошні аргумент – пачытай Евангелле, папрысутнічай на Літургіі. Невядома, што адбываецца з чалавекам падчас таго чытання Слова Божага ці прысутнасці на Літургіі, але часта здаралася так, што пасля гэтага ўсе мае важкія аргументы былі ўжо непатрэбнымі. Ідзі і пабач!

Падрабязней...

25-26.11 Каложскі дыярыуш. Аглашэнныя. Малітва як у манахаў-калажан. Дзень святарскага нараджэння. З такімі Бог! Цяжкія чытанні.

25.11. Панядзелак.

Панядзелак адзначыўся трыма сустрэчамі. Перадхрышчальная размова з Людмілай, якая рыхтуецца прыняць Таінства святога Хрышчэння ў дзень Увядзення Прысвятой Багародзіцы - 4 снежня. Гэта ўжо трэцяя наша катэхізічная сустрэча. Тэма яе: хрысціянскае жыццё. Гаварылі пра малітву асабістую і абшчынную, пра ўдзел у Літургіі і пра споведзь, пра пасты, пра справы міласэрнасці і інш. Людміла – чалавек у сталым узросце і вельмі свядома падыходзіць да гэтага жыццёвага кроку. Акрамя нашых размоў, чытае адпаведную літаратуру і слухае аўдыёлекцыі.

Вечарам таксама перадхрышчальная размова з Хрысцінай. Яна маладая і прыгожая дзяўчына. Уверавала ў Хрыста і жадае жыць хрысціянскай верай. Гэта была другая нашая сустрэча. Хрысціна прачытала Евангелле ад Лукі і ад Мацвея. Пачала чытаць іншыя новазапаветныя кнігі.

Падрабязней...

23-24.11. Каложскі дыярыуш

23.11. Субота. Адбылася яшчэ адна Літургія на роднай мове. Беларуская літургія ў кожную суботу – новая традыцыя нашага каложскага прыходу. Па-беларуску служым таксама і кожную першую нядзелю месяца. Асабліва радасна за тых, каму такое набажэнства сапраўды патрэбнае.

Пасля Літургіі хрышчэнні і бацькоўскі сход у нашай нядзельнай школе. Ёсць неабходнасць перагледзець вучэбныя праграмы і ўвогуле падыходы да выкладання. Тое, што было добра 10 гадоў таму, цяпер ужо не адпавядае выхаваўчым патрэбам. Вельмі важна нам было пачуць бацькоў і іх ацэнку работы школы. Размова атрымалася вельмі шчырая. Больш мабільнасці. Дзеці дрэнна ўспрымаюць лекцыйную форму заняткаў. Непасрэдны ўдзел дзяцей у набажэнстве, не толькі хлопчыкаў, але і дзяўчынак. Спевы. Вырабы ўласнымі рукамі. Паломніцтвы і паходы. Размовы са святарамі. Арганізацыя святаў. Бацькі чакаюць, што ў нядзельнай школе дзеці змогуць сфарміраваць нейкі стрыжань свайго светапогляду і маралі. Навучанне пры царкве павінна дапамагчы ім пазбегнуць згубных уплываў сучаснасці на іх дзяцей. Працаваць сапраўды ёсць над чым. Божа, дапамажы!

Падрабязней...

22.11. Каложскі дыярыуш.

Сардэчныя прывітанні ўсім чытачам дыярыуша! Падзяка Госпаду, прайшоў яшчэ адзін дзень Боскай міласці! Дзень, як здаецца, плённы, насычаны і цікавы.

Сёння з самага ранку непераадольна пацягнула на шпацыр па горадзе, які прачынаўся і спяшаўся на працу. Ёсць асаблівая прыгажосць у позневосеньскай крыху туманнай раніцы. Маршрут быў такім: Каложа – набярэжная Нёмана – пад’ём да Новага Замку – Савецкая плошча – Савецкая вуліца – Віленская вуліца – Віленскі завулак – Лермантава – Каложа. Такі паход прыдаў бадзёрасці на ўвесь дзень. Сёння вянчалі – апошні дзень года, калі можна было пабрацца царкоўным шлюбам. Перад Богам засведчылі сваю ўзаемную любоў шэсць пар маладых. Дай Божа ім захаваць і памножыць самы цудоўны Твой дар – дар любові.

Вечарам у Каложы адбылася сустрэча з гарадзенскімі мастакамі, якія прыйшлі пазнаёміцца з выставай ікон. Сустракаў гасцей а. Аляксандр, а. Ігар сустракаўся з тымі, хто рыхтуецца да хрышчэння, а я накіраваўся ў галерэю “Крыга”, дзе адбылася прэзентацыя кнігі Аллы Петрушкевіч пра Наталлю Арсеньеву. Упершыню наведаў “Крыгу”. Спадабаліся і інтэр’ер, і атмасфера. Я аддаю перавагу прозе, і не часта бывае, што мяне кранае паэзія, але сёння такое адбылося. Вялікі дзякуй тым, хто чытаў вершы. Мне больш цікавая была сама постаць Н. Арсеньевай, чым яе творчасць, але вершы сапраўды цудоўныя. Асобыя кампліменты аўтарцы кнігі і вядучай Алле Мікалаеўне! Яе беларуская мова як вельмі прыгожая песня. Сустрэў калажан. Прывітанне Мікалаю, Інне з Міхалінкай, Кацярыне. У прэзентацыі прымаў самы актыўны творчы ўдзел яшчэ адзін наш брат – іпадыякан кафедральнага Сабора, студэнт філфака Дзмітрый.

Пасля прызентацыі яшчэ паспеў і на размову з гарадзенскімі мастакамі, якія завіталі ў Каложу. Такім чынам, за адзін вечар дзве насычаныя культурныя падзеі. Сапраўды Дух Святы дыхае не толькі ў царкве, але і ў культуры, і ў творчасці. Цудоўна, калі творцы чэрпаюць з гэтай Крыніцы. Дарэчы Бог-Творца ў старажытнагрэчаскім арыгінале Бібліі называецца “поэтос” – паэт.

Добрых выходных!

Протаіерэй Георгій Рой

20.11 - 21.11. Агонь Хрыстоў. Калажане з Тулы. Савва. Выстава ікон.

Каложскі дыярыуш.

Серада 20.11. Служыў Літургію. У Евангеллі словы Хрыстовы: “Агонь прыйшоў Я нізвесці на зямлю… Ці думаеце вы, што Я прыйшоў даць мір зямлі? Не, кажу вам, але раздяленне”. Такім чынам, праўда Хрыстова – агонь у гэтым свеце. Ён можа грэць, а можа і апальваць. Хрысціянства не можа быць безканфліктным і безпрынцыповым.

Прычашчаўся за Літургіяй толькі адзін чалавек, хаця ў царкве маліліся чалавек пятнаццаць. Прычаснікам быў хросны хлопчыка Саввы, якога мы і хрысцілі адразу пасля Літургіі. Бацькі Саввы – расіяне, жывуць непадалёку ад Тулы, веруючыя свядомыя праваслаўныя людзі. У Гародні ды і на Беларусі ўвогуле сваякоў не маюць. У Гародні жыве іх сябар, які і быў хросным. Дык вось яны спецыяльна прыехалі ў Гродна з нованароджанным, каб ахрысціць яго ў старажытнай Каложы. Вельмі любяць яны нашу царкву і наш горад. Чым не калажане?! На развітанне пачаставалі мяне сапраўдным тульскім пернікам: вялізарны і сапраўды вельмі смачны.

Падрабязней...

Каложскі дыярыуш. 19.11.2013

Дзень пачаўся з наведвання хворых у першай бальніцы. Да прычасця запісалася больш за 50 чалавек. Прычашчалі ўдваіх з а. Ігарам, і дапамагалі нам Анатоль і Варвара. Бальніца гэтая спецыялізуецца на лячэнні інсультаў. А інсульты, як вядома, маюць вельмі цяжкія наступствы. Таму і прычашчаць там ва ўсіх адносінах бывае няпроста. Цяжка бачыць, як людзі пакутуюць. Часта не могуць сказаць ні слова, толькі слёзы… Паразмаўлялі з медсёстрамі. Патрэбныя памперсы для дарослых. Бюджэт бальніцы не прадугледжвае іх закупку. Добра, калі набудуць блізкія хворых, але бывае і такое, што ў чалавека нікога няма. Адным словам будзем дапамагаць.

Потым было наведванне епархіі. Сустрэча супрацоўнікаў епархіяльнага інфармацыйнага аддзелу. Абмяркоўвалі бліжэйшыя справы. Далей праца над прапановамі Гродзенскай епархіі да агульнацаркоўных дакументаў Міжсаборнай прысутнасці па практыцы прычасця і шлюбу. Быў таксама цэлы шэраг цякучых прыхадскіх справаў.

Падрабязней...

Расклад богаслужэнняў

Мінулы месяц Красавік 2017 Наступны месяц
Пн Ат Ср Чц Пт Сб Нд
week 13 1 2
week 14 3 4 5 6 7 8 9
week 15 10 11 12 13 14 15 16
week 16 17 18 19 20 21 22 23
week 17 24 25 26 27 28 29 30
Увайсці

Аўтарызацыя

Імя карыстальніка *
Пароль *
Запомніць мяне

Падпіска на вершы Л.Геніюш

Каложа 360°

Навіны Гродзенскай епархіі

Уваход

Д/ф "Каложа" (2007 г.)