20.11 - 21.11. Агонь Хрыстоў. Калажане з Тулы. Савва. Выстава ікон.

Каложскі дыярыуш.

Серада 20.11. Служыў Літургію. У Евангеллі словы Хрыстовы: “Агонь прыйшоў Я нізвесці на зямлю… Ці думаеце вы, што Я прыйшоў даць мір зямлі? Не, кажу вам, але раздяленне”. Такім чынам, праўда Хрыстова – агонь у гэтым свеце. Ён можа грэць, а можа і апальваць. Хрысціянства не можа быць безканфліктным і безпрынцыповым.

Прычашчаўся за Літургіяй толькі адзін чалавек, хаця ў царкве маліліся чалавек пятнаццаць. Прычаснікам быў хросны хлопчыка Саввы, якога мы і хрысцілі адразу пасля Літургіі. Бацькі Саввы – расіяне, жывуць непадалёку ад Тулы, веруючыя свядомыя праваслаўныя людзі. У Гародні ды і на Беларусі ўвогуле сваякоў не маюць. У Гародні жыве іх сябар, які і быў хросным. Дык вось яны спецыяльна прыехалі ў Гродна з нованароджанным, каб ахрысціць яго ў старажытнай Каложы. Вельмі любяць яны нашу царкву і наш горад. Чым не калажане?! На развітанне пачаставалі мяне сапраўдным тульскім пернікам: вялізарны і сапраўды вельмі смачны.

Увечары служылі ўсяночнае трыванне напярэдадні свята архістраціга Міхаіла. Памаліцца змог толькі а. Ігар. Ён і ўзначаліў набажэнства. Я спачатку спавядаў, а затым суразмова з хроснымі – праверка ведання Сімвала веры і малітвы “Ойча наш”, а таксама мноства практычных пытанняў, звязаных з хрэсьбінамі. Пасля гэтай размовы было яшчэ Сабораванне. Айцец Аляксандр займаўся падрыхтоўкай выставы ў Каложскай царкве. Справа гэтая зацягнулася гадзін да дзесяці вечара. Прамёрзліся.

Чацвер 21.11. Святочная Літургія. Свята архістраціга Міхаіла і ўсіх бясплотных сілаў нябесных. На гэты ж дзень прызначана адкрыццё выставы сучаснай іконы. Выстава носіць назву “Святыя пакутнікі непадзеленай Царквы – сведкі ісціны”. Іконы гэтыя, дарэчы, стваралі не прафесійныя іканапісцы, а сучасныя мастакі, якія паспрабавалі свае здольнасці і ў традыцыі іконапісу. Месца іконы – царква, і прыдназначэнне яе – малітва. Таму і вырашылі мы выставіць гэтыя абразы не ў зале, а ў Каложы. І першае, што адбылося – малітва. У Літургіі прынялі ўдзел і прычасціліся некаторыя з тых, хто стварыў гэтыя іконы. Пасля Літургіі спецыяльнай малітвай ушанавалі святых пакутнікаў, выяўленных на іконах. І затым ужо адбылося афіцыйнае адкрыццё выставы. За ўвесь дзень даў мабыць шэсць ці нават сем інтэрв’ю розным СМІ. Можна сказаць, што мерапрыемства атрымала шырокі рэзананс.

Протаіерэй Георгій Рой


Расклад богаслужэнняў

Увайсці

Аўтарызацыя

Імя карыстальніка *
Пароль *
Запомніць мяне

Падпіска на вершы Л.Геніюш

Каложа 360°

Навіны Гродзенскай епархіі

Уваход

Д/ф "Каложа" (2007 г.)